متحدہ عرب امارات میں ایک بزرگ شہری نے اکیلے کھانا کھانے سے ڈر لگنے پر پولیس بلالی۔
عرب میڈیا کے مطابق دبئی پولیس کے جنرل ڈائریکٹوریٹ کے کمانڈ اینڈ کنٹرول کے سربراہ کرنل ترکی بن فارس نے بتایا کہ کنٹرول روم میں مدد کے لیے موصول ہونے والی فون کالز میں بعض اوقات ایسی کالز موصول ہوتی ہیں جن کا ہنگامی صورت حال سے کوئی تعلق نہیں ہوتا ہے۔
کرنل ترکی بن فارس نے کہا کہ شہری اور تارکین وطن ایسی کالز تواتر کے ساتھ کرتے ہیں۔
انہوں نے کہا کہ حالیہ دنوں میں ہمیں ایک بزرگ شہری کی کال موصول ہوئی جس میں انہوں نے بتایا کہ وہ اپنے گھر میں اکیلے ہیں اور انہیں تنہا کھانا کھاتے ہوئے ڈر لگتا ہے۔
کرنل ترکی بن فارس نے بتایا کہ ہم نے ان بزرگ شہری کی کال کو انسانی بنیادوں پر سنا، اسے ہنگامی کالز کے طور پر ڈیل نہیں کیا جاسکتا تھا تاہم انسانی پہلو سے ہم نے اس کال کو سن کر بزرگ شہری کو کھانے میں جاکر کمپنی دی تاکہ وہ مایوسی میں کوئی انتہائی قدم نہ اٹھالیں۔
رپورٹ کے مطابق گزشتہ سال ایمرجنسی لائن پر 541722 کالز کی گئیں جن میں سے 70 فیصد کالز کا تعلق ہنگامی صورت حال سے نہیں تھا۔
میجر جنرل کامل السویدی کا کہنا تھا کہ والدین، اسکول اور یونیورسٹی انتظامیہ کو طالب علموں کو ہنگامی بنیادوں پر کالز کے حوالے سے آگاہی فراہم کرنی چاہئے۔
السویدی کا کہنا تھا کہ ایمرجنسی نمبر 901 پر کالز کا فوری جواب دیا جاتا ہے جس کسی شہری کو بھی سیکیورٹی کے حوالے سے کوئی مسائل درپیش ہوں تو وہ 901 پر رابطہ کرسکتا ہے۔
