امریکا کی جانب سے کمپنیوں کو نشانہ بنانے پر چین کی جانب سے کافی ردعمل سامنے آیا ہے مگر ایک سفارتکار نے ہواوے ٹیکنالوجیز کمپنی کے دفاع کے لیے مزاح کا سہارا لیا ہے۔
اسلام آباد میں چینی سفارتخانے کے ڈپٹی چیف مشن زہاﺅ لی جیان نے ٹوئٹر پر ہواوے کو بلیک لسٹ کرنے کے امریکی فیصلے پر ردعمل ظاہر کیا اور ایپل کو نشانہ بنایا۔
انہوں نے لکھا ‘اب اس بات کا انکشاف ہوا ہے کہ آخر ڈونلڈ چین کی ایک نجی کمپنی سے اتنی نفرت کیوں کرتے ہیں، ذرا ہواوے کا لوگو تو دیکھیں، اس نے ایپل کو ٹکڑوں میں کاٹ دیا ہے’۔
زہاﺅ لی جیان نے جب یہ ٹوئیٹ کیا تو ان کے ٹوئٹر فالورز ایک لاکھ 70 ہزار سے زائد تھے اور اب وہ بڑھ کر ایک لاکھ 86 ہزار سے زیادہ ہوگئے ہیں۔
BREAKING: It has been just revealed why @realDonaldTrump hated a private company from China so much that it went so far by announcing a national emergency. Look at the logo of Huawei. It has cut APPLE into pieces… pic.twitter.com/KOXstlAsja
— Lijian Zhao 赵立坚 (@zlj517) May 20, 2019
انہوں نے اس سے قبل 20 مئی کو بھی ایک ٹوئیٹ کیا تھا جس میں لکھا تھا ‘ہواوے نے آخر امریکا کو کانپنے اور دیوانہ کیوں کردیا ہے؟ اس کی وجہ ہواوے کے نئے فون کے کیمرے کا آپٹیکل زوم ہے جو حیران کردینے والا ہے’۔
Why is Huawei making America tremble and go insane? Huawei's new phone camera's optical zoom is just insane. pic.twitter.com/tESGjR83U7
— Lijian Zhao 赵立坚 (@zlj517) May 20, 2019
خیال رہے کہ گزشتہ ہفتے امریکا نے ہواوے کو بلیک لسٹ کردیا تھا جس کے باعث امریکی کمپنیوں کو ہواوے کے ساتھ کام کرنے کے لیے حکومتی منظوری درکار تھی۔
یہی وجہ ہے کہ گوگل نے پیر کو اعلان کیا تھا کہ وہ ہواوے سے اپنا تعلق ختم کررہی ہے، جس کے فونز میں گوگل کے اینڈرائیڈ آپریٹنگ سسٹم کو استعمال کیا جارہا ہے۔
گوگل کے اعلان نے ہواوے صارفین میں تشویش کی لہر دوڑا دی تھی اور چینی کمپنی کو یقین دہانی کرانا پڑی تھی کہ وہ اپنے آپریٹنگ سسٹم کی تیاری پر کام کررہی ہے۔
مگر پیر کو امریکی محکمہ تجارت نے چینی کمپنی پر عائد تجارتی پابندیوں کو 3 ماہ کے لیے روک دیا تھا۔
اس اعلان کے بعد گوگل نے بھی 19 اگست تک کے لیے ہواوے کے ساتھ اینڈرائیڈ سروسز بحال رکھنے کا اعلان کیا۔
