انسداد دہشت گردی کی خصوصی عدالت نے زینب قتل کیس میں فریقین کے دلائل مکمل ہونے کے بعد فیصلہ محفوظ کرلیا ہے۔زینب قتل کیس کا فیصلہ 17فروری کو سنایا جائےگا۔
کوٹ لکھپت جیل میں انسداد دہشت گردی کی عدالت میں مسلسل چوتھے روز کیس کی سماعت کی گئی۔ فریقین کے دلائل مکمل ہونے کے بعد عدالت نے زینب قتل کیس کا فیصلہ محفوظ کرلیا۔
استغاثہ کی جانب سے زینب کیس کے ملزم عمران کے خلاف 56 گواہان پیش کیے گئے۔
پراسیکیوٹر کا کہنا ہے کہ فرانزک رپورٹس کے مطابق عمران ہی زینب کا قاتل ہے۔
گزشتہ روزملزم عمران کی جانب سے قصور کی کمسن بچی زینب کو درندگی کا نشانہ بنانے کے اعتراف کے بعد ملزم عمران کے وکیل نے اپنا وکالت نامہ واپس لے لیا تھا۔
عمران کے وکیل کا کہنا تھا کہ اقرار جرم کے بعد ضمیر گوارا نہیں کرتا کہ سفاک ملزم کا کیس لڑوں۔